2 parak ’di gumamit ng helmet, sinibak

MANILA, Philippines - Matapos maaktuhang wa­lang­ suot na helmet habang nagmamaneho ng motorsiklo, dalawang pulis-Maynila ang sinibak kahapon sa puwesto ni National Capital Region Police Office (NCRPO) Di­rector Chief Supt. Marcelo Garbo Jr. kahapon ng umaga.

Ang mga sinibak ay sina PO2s Nuñez at Paes, na nakatalaga sa Barbosa Police Community Precinct ng MPD  Station 3 at bilang command responsibility, pinasisibak din ni Garbo sa puwesto ang superior ng dalawang pulis na sina Senior Supt. Ricardo Layug, hepe ng MDA Station 3 at Barbosa PCP com­mander na si Senior Ins­pector Robinson Maranion.

Base sa report, patungo ng La-Loma Police Station si Garbo upang magsagawa ng surprise inspection kahapon ng umaga nang maaktuhan niya sina PO2s Nuñez at Paes na nakasuot ng uni­porme na nakasakay sa motor­siklo na walang suot na helmet at kanya itong sinita.

Hanggang sa nalaman umano ni Garbo na pulis-Maynila ang dalawa at naka­talaga sa Barbosa PCP ng MPD Station 3.

Bukod pa rito, nakita rin ni Garbo na isa sa dalawang pulis ay may bigote na kung saan mahigpit itong ipinagba­bawal sa isang alagad ng batas.

Nauna rito, 8 pulis Mun­tinlupa City ang sinibak din ni Garbo matapos ma-late sa pagdalo ng command con­­ference na ginanap sa Muntinlupa City Head­quarters.