Tsinoy timbog sa P75-M shabu

MANILA, Philippines - Bigo man sa inilatag na buy-bust operation ang mga awtoridad, tagumpay pa rin sila sa pag-aresto sa isang Filipino-Chinese na sinasabing big-time drug trafficker na nagtangkang tumakas nang maamoy ang inilatag na bitag ng mga tauhan ng Philippine Drug Enforcement Agency (PDEA), kung saan na­rekober sa kanyang sa­sak­yan ang may 15 kilo ng shabu na tinatayang nagkakahalaga ng P75 milyon sa Ermita, Maynila, kahapon.

Pinipigil pa sa Manila Police District-Station 5, ang inarestong suspect na si Antonio Uy, residente ng Elcano St., Binondo, Maynila.

Sa inisyal na ulat SPO2 Boyet Leyva ng MPD Station­ 5, bandang alas-10:30 ng umaga nang ma­kipag-ugnayan ang grupo ng PDEA sa pangunguna ni Carlos Soriano kay MPD-Station 5 chief, P/Supt. Orlando Mirando.

Pasado alas-12:00 naman ng tanghali nang isagawa ang buy-bust ope­ration sa may bahagi ng Magsaysay Tower sa Roxas Boulevard.

Subalit sa nakatakdang operasyon, hindi umano tumuloy­ sa transaksiyon ang suspect na lulan ng Toyota Camry (ZBG-553) na kulay­ silver,  nang makatunog na isiniset-up lang siya kaya humarurot papatakas.

Hinabol siya ng mga operatiba ng PDEA na lulan ng dalawang kotse at isang motorsiklo at pagdating sa bahagi ng Roxas Boule­vard, ay doon pinaputukan ang hulihang bahagi ng  sasakyan nito.

Nakorner na rin ang suspect sa panulukan ng San Andres at M.H. Del Pilar St., sa Ermita, kung saan ina­resto ito at nasamsam ang nasabing iligal na droga­  na itinago sa isang itim na travelling bag sa loob ng dala nitong  sasakyan.