Perjury na isinampa ni Napoles vs whistleblowers, ibinasura

MANILA, Philippines - Ibinasura ng Manila City Prosecutor’s Office ang reklamong perjury na isinampa ng itinuturong pork barrel queen na si Janet Lim-Napoles laban kay Benhur Luy at iba pang whistleblower.

Batay ito sa 11-pahinang consolidated re­solution na inirekomenda ng handling pro­secutor na si Philger Noel Inovejas na inaprubahan ni Senior Deputy City Prosecutor Eufrosino Sulla.

Bukod kay Luy, ka­ bilang sa mga ipinag­harap ng reklamo ang mga magulang nito   na sina Arturo at Gertrudes at kapatid na si Arthur, gayundin ang isa pang whistleblower na si Merlina Sunas, dating empleyado ng JLN Corporation.

Ginawang batayan ni Napoles sa paghahain ng reklamo ang ka­nilang sinumpaang salaysay na isinumite sa Department of Justice (DOJ) na nagsasabing si Benhur ay nananatili sa kanyang kustodiya nang taliwas sa kanyang kagustuhan.

Sa resolusyon ng Manila Prosecutor’s Office, ang reklamo ay ibinasura dahil sa kakulangan ng ebidensya.

Dahil dito, wala uma­nong probable cause para maisulong ang kaso sa korte.

Tinukoy pa sa reso­lusyon na nabigo si Napoles na patunayan na mali ang alegasyon ng mga respondent hinggil sa iligal na pagkakadetine ni Benhur Luy.

Hindi rin umano na­pasinungalingan ni Napoles ang ale­gasyon ng mga respon­dent hinggil sa kanya umanong pagkakasangkot sa ma­anomalyang mga transaksyon gamit ang pondo ng gobyerno.