Kuya binoga ni bunso

MANILA, Philippines -  Sugatan ang isang 33-anyos na vendor matapos na barilin ng kanyang bunsong kapatid na inawat niya sa pakikipag-away sa kainuman sa Brgy. Pinagbuhatan, Pasig City kamakalawa ng gabi.

Kinilala ni P/Chief Insp. Glenn Magsino, hepe ng Criminal Investigation Section ng Pasig City Police, ang biktima na si Richard Augustia, 33, at residente ng Block 5, Esguerra St., Villa Monique, Brgy. Pinagbuhatan.

Si Richard ay naka-confine ngayon sa Rizal Medical Center­ (RMC) bunsod ng tinamong tama ng bala ng sumpak sa dibdib na tumagos sa kaliwang balikat.

Mabilis namang tumakas ang suspek na kapatid nito na si Ramon Augustia, 19,  vendor.

Batay sa report dakong alas-7:45 ng gabi nang maganap ang pamamaril sa kahabaan ng Villa Monique sa naturang barangay.

Bago ang krimen, masayang nag-iinuman si Ramon kasama ang mga kaibigan nito ngunit nang malasing ay nagkaroon ng pagtatalo sa pagitan ng grupo.

Inawat naman umano ni Richard si Ramon sa pakikipag-away, ngunit sa halip na magpaawat ay pinagbalingan nito ng galit ang nakatatandang kapatid at binaril ng sumpak.

Nang makitang bumagsak ang kapatid ay mabilis na tumakas ang suspek habang isinugod naman sa nasabing pagamutan ang biktima.