Lola na abortionist, timbog

MANILA, Philippines - Arestado ang isang lolang abortionist matapos itong maaktuhang nagsasagawa ng kanyang ilegal na gawain sa isang babae, kamakalawa sa Caloocan City.

Nakilala ang suspek na si Catalina Jose, alyas “Aling Tali”, 92, ng Phase 2, Bagong Silang ng naturang  lungsod.

Ginagamot naman sa Jose Rodriguez Memorial Hospital ang 22-anyos na dalagang nagpapalaglag dahil sa dami ng dugong nawala na si Joan Bertiz, ng Kasig­lahan Village, Rodri­guez, Rizal.

Lumalabas sa report ng Caloocan City Police, dakong alas-4:00 ng hapon, base sa bisa ng warrant of arrest na dala ng mga pulis ay pinuntahan nila ang suspek upang dakpin sa tinitirahan nito sa naturang lugar.

Naaktuhan ng mga pulis na may nakahigang babae at nagsasagawa ng abortion ang suspek. Inamin ng dalaga na ipina­laglag niya ang 5-buwan fetus sa kanyang sinapupunan sa halagang P4,000 na naging dahilan upang agad na dalhin sa nasabing ospital.

Ang naturang suspek naman ay kaagad na dinala ng mga pulis sa himpilan ng pulisya.

Napag-alaman na ilang beses nang nadakip si Jose subalit matapos makapag-pi­yansa ay nagpapatuloy sa illegal na gawain nito.