Indian national pinatay habang naniningil ng pautang

MANILA, Philippines - Isang Indian national ang nasawi  nang pagbabarilin ito ng dalawang hindi pa nakikilalang suspek kamakalawa ng gabi sa Valenzuela City.

Dead on the spot ang biktimang si Kulwant Singh, 59, ng Dama De Noche St., Brgy.  Marulas ng naturang lungsod sanhi ng tinamong ilang tama ng bala sa ulo at katawan.

Batay sa ulat na nakarating kay Sr. Supt. Rhoderick Armamento, hepe ng Valenzuela City Police, naganap ang insidente dakong alas-7:00 ng gabi  sa kahabaan ng Pio Valenzuela St., Brgy. Marulas ng naturang lungsod habang ang biktima ay  naniningil ng pautang nang biglang sumulpot ang mga suspek  na nakasakay rin ng motorsiklo.

Walang sabi-sabing pinagbabaril ang biktima na naging dahilan ng agarang kamatayan nito.

Matapos ang insidente ay mabilis na nagsitakas ang mga suspek habang nagsasagawa pa ng imbestigasyon ang pulisya sa motibo nang pagpasalang dito.