Minamanehong truck tumirik, nagsanhi ng trapik: Driver binoga, utas sa naasar na motorista

MANILA, Philippines - Binaril at napatay ang isang truck driver ng isang naasar na motorista makaraang magsanhi ng matin­ding trapik ang tumirik na sasakyan ng una sa Caloocan City, kamakalawa ng gabi.

Dead-on-the-spot sanhi ng mga tama ng bala sa katawan ang biktimang si Charlie Gorope, 42, ng Gaya-gaya, San Jose Del Monte, Bulacan.

Pinaghahanap naman ng mga pulis ang driver ng Mitsubishi Adventure na may plakang TEI-531 na tumakas at iniwan nito  ang minamanehong nasabing sasakyan.

 Base sa ulat ng Caloocan City Police, naganap ang insidente dakong alas-6:30 ng gabi sa Phase 12 Construction Supply, ID Road, Tala ng naturang lungsod.

Nabatid na nagmama­niobra ang biktima sa mina­maneho nitong  trailer truck upang makapasok sa gate ng naturang establisimento, subalit  pumalya ang ma­kina nito, dahilan upang tumirik ang naturang trailer at humambalang sa kalsada na naging sanhi ng pagsi­sikip ng daloy ng trapiko.

Naasar umano ang suspect na ang sasakyan ay ka­sunod ng tumirik na truck. Armado ng baril, nilapitan nito ang biktima at walang sabi-sabi itong binaril na naging sanhi ng kama­tayan ng huli. Dahil hindi rin makaka­alis dahil sa trapik kung kaya’t iniwan na nito ang sasakyan at dali-daling tumakas. Masusing iniimbestigahan ng pulisya ang naturang insidente.