Obrero binoga sa ulo dedo

MANILA, Philippines - Patay ang isang construction worker makaraang barilin sa ulo ng hindi nakikilalang salarin sa lungsod Quezon kamakalawa.                    

Kinilala ang biktima na si Herbert Loleng, 26, residente sa San Gregorio, Alaminos, Laguna habang blangko naman sila sa pagkakakilanlan ng suspect dahil wala namang nakakita sa mga residente sa pangyayari.               

Ayon kay SPO1 Randy Bantillo, nangyari ang insidente sa may harap ng Julies bakeshop na matatagpuan sa kahabaan ng Susano Road, Barangay Novaliches Proper, ganap na alas 8: 20 ng gabi.

Sinabi  ng saksing si Benjie Merandilla, naglalakad siya sa naturang lugar nang makarinig siya ng isang malakas na putok ng baril malapit dito. Nang kanyang tignan ang pinanggalingan ng putok ay saka bumulaga sa kanyang harapan ang duguang katawan ng biktima habang nakalugmok sa gitna ng naturang kalsada.

Agad siyang humingi ng ayuda sa mga istambay sa lugar saka ipinagbigay alam ang insidente sa awtoridad.

Sa pagsisiyasat ng Scene of the Crime Operations napag-alamang ang biktima ay nagtamo ng isang tama ng bala sa likod ng kanyang ulo na siyang agad na ikinamatay nito.

Patuloy ang imbestigasyon ng awtoridad sa nasabing insidente.