Motorsiklo nawalan ng preno, rider dedo

MANILA, Philippines - Isang rider ang na­­­matay matapos na tumilapon mula sa kan­yang motorsiklo at ma­­gulungan ng dump truck nang  mawalan ng  preno  kamakalawa ng gabi sa Taguig City.

Dead-on-the-spot si Roderick Hisaran, 31, nakatira sa #21 San Sebastian, Kawit, Cavite.

Ayon sa imbestigasyon ni P03 Jerry Ricablanca, ng Station Investigation Division (SID),  Taguig City Police, naganap ang insidente dakong alas-11:40 ng gabi, malapit sa Hagonoy Pumping Station,  C-5 Road, Bgy. Hagonoy ng nabanggit na lungsod.

Nabatid na minamaneho ng biktima ang kanyang Honda Motorcycle na may plakang UI-5914 sa  kahabaan ng  south bound ng C-5 Road nang mawalan ng preno at magresulta sa kanyang pagtilapon sa kabilang  lane.

Paparating naman ang isang dump truck na may plakang RHP-763, na minamaneho ni Romeo Reyes Jr., 44, may asawa, taga Block 6, Lot 5, Percon St., Br gy. Tin Tin, Tandang Sora, Quezon City kung saan  nagulungan ang  biktima.

Nasa custody ng pu­lisya ang driver ng truck at patuloy na iniimbestigahan ang naturang insidente.