‘Akyat-bahay’ nakuryente, patay

MANILA, Philippines - Isang lalaki na hinihinalang miyembro ng ‘Akyat bahay gang’ ang nasawi matapos na makuryente sa nilooban nitong pribadong compound sa Taguig City kamakalawa.

Matigas at isa nang malamig na bangkay makaraang matagpuan ang biktimang  si Mandy Lopena, 21, ng Brgy.  Bagumbayan, ng naturang siyudad.

Sa naantalang report na nakarating kahapon sa tanggapan ng Taguig City Police natagpuan ang bangkay ng biktima sa loob ng pribadong compound na pag-aari ng isang nangngangalang Cornelio Tanyo­, na matatagpuan sa Santo Niño St., Holy Fa­­mily Village, Brgy. Bagumbayan ng naturang lungsod.

Ayon sa pagsisiyasat,  nabatid na tinangka umano ng biktima na akyatin ang mataas na bakod patungo sa private compound ni  Tanyo nang aksidenteng mahawakan nito ang kawad ng kuryente na nasa ibabaw ng pader.

Dahil sa lakas ng boltahe nahulog mula sa mataas na bakod  ang biktima matapos itong makuryente na naging sanhi ng agaran nitong kamatayan.

Ayon sa record ng pulisya, nabatid na ang biktima   ay sinasabing sakit umano ng ulo sa kanilang barangay dahil sa maraming beses na umano itong nasasangkot sa kaso ng nakawan.