Taxi driver hinoldap ng 3 pasahero, taxi tangay din

MANILA, Philippines - Sa kabila ng ipinapa­tupad na checkpoint ng Quezon City Police District nakakalusot pa rin ang mga masasa­mang-loob sa nasabing lungsod.

Ito’y matapos na isang taxi driver na nakilalang si Raffy Caduhada, 35, ang hinoldap at nakunan ng perang kinita sa mag­damag na pamamasada. Bukod dito, tinangay pa ang pinapasada nitong sa­sakyan na nangyari kaha­pon ng madaling-araw.

Ang mga suspect, isang babae at dalawang lalaki na hindi mapagkakamalan umanong holdaper dahil sa kanilang modus ope­randi ang pagsasama ng isang babae sa operasyon.

Natangay ng mga suspect sa biktima ang halagang P3,820 at taxi nitong Nissan Sentra na may mar­kang Pabix taxi (UVM-776).

Sa ulat, nangyari ang in­sidente sa may Brgy. San Martin De Pores, Cubao, ganap na alas-2:30 ng mada­ling-araw.

Sumakay umano kay Ca­duhada ang mga suspect sa Pureza Manila at nagpahatid sa may Partas Terminal sa Cubao.

Pagsapit sa harap ng Driod St., sa nasa­bing ba­rangay ay biglang nag­labas ng patalim ang mga suspect at nagdeklara ng holdap.

Dito na sinimulan ng mga suspect na kunin ang pera ng biktima na agad na pinaupo sa likuran, ha­bang ang isang suspect na lalaki naman ang nagmaneho ng taksi at pinaharurot ito palayo.

Pagsapit sa isang lugar sa New Manila ay saka pi­nababa ang biktima, at itinakas ang sasakyan na nagsilbi nilang get away.

Sa kasalukuyan, patuloy ang follow-up operation ng QCPD laban sa naturang mga suspect.