Kuya utas kay bunso
MANILA, Philippines - Napatay ng isang lalaki ang kanyang nakatatandang kapatid matapos ang mainitang pagtatalo na nauwi sa suntukan sa Sampaloc, Maynila.
Dead-on-arrival sa Ospital ng Sampaloc ang biktimang si Cezar Cristobal, 34, ng Carola St., Sampaloc, Maynila sanhi ng tinamong saksak sa katawan.
Samantala, pinaghahanap naman ng mga awtoridad ang suspect na si Crispin, 32, bunsong kapatid ng biktima na tumakas matapos ang insidente.
Ayon sa pulisya, naganap ang insidente dakong alas-2:50 ng hapon sa kalsada ng Carola St., Sampaloc, Maynila.
Nabatid na nagsuntukan muna ang dalawa sa hindi pa mabatid na dahilan at nakita na lang ang pagbagsak ng biktima.
Napag-alaman pa na patay na ang mga magulang ng dalawa at malimit umano itong nag-aaway. Kamakalawa, muling nagtalo ang magkapatid at nauwi sa suntukan hanggang sa bumunot ng patalim si Crispin. Gayunman patuloy na nagsagawa ng imbestigasyon ang pulisya hinggil sa nasabing insidente.
- Latest
