Helper nagbaril sa sarili

MANILA, Philippines - Isang 34-anyos na helper ang nagbaril sa sarili matapos nitong agawin ang boga ng isang sekyu sa Tondo, Maynila,  kamakalawa ng gabi.

Dead-on-arrival sa Jose Reyes Memorial Medical Center  ang biktimang si Rey Penaverde,  ng Yangco St., Tondo, Maynila.

Sa ulat ng pulisya, dakong alas-11:40 ng gabi nang maganap  ang insidente sa compound sa Old Torres St., Tondo.

Bago ang insidente, naabutan umano ng isang Alejandro Ariola, 42, security guard sa compound, ang biktima na naghahalungkat sa kanyang locker kaya tinanong ito kung anong kinukuha na sinagot naman ng huli na baka naitago nito ang tools ng isang John sa kanyang locker.

Nabigla na lamang umano si  Ariola nang biglang hablutin ng biktima ang kalibre 38 niyang service firearm at  itinakbo na hinabol ng una  hanggang na nakaakyat  ito sa gate ng  katabing gusali at saka ito nagbaril sa sarili.

Inaalam pa ng pulisya kung ano ang motibo ng biktima kung bakit ito nagpakamatay at binubusisi rin kung may naganap na foul play.