B-day celebrant kritikal sa saksak ng bisita
MANILA, Philippines - Naging madugo ang dapat sana’y masayang selebrasyon ng kaarawan ng isang 23-anyos na lalaki makaraang pagsasaksakin ng isa niyang bisita, kahapon ng madaling araw sa Marikina City.
Kritikal sa loob ng Amang Rodriguez Medical Center ang biktimang si Jonathan Bingza, ng Block 48 Farmers, Brgy. Tumana ng naturang lungsod.
Pinaghahanap naman ang nakatakas na suspek na nakilalang si Ferdilan Fortez, kapitbahay ng biktima.
Sa ulat ng Marikina City Police, naganap ang krimen dakong alas-2:30 kahapon ng madaling araw sa tapat ng bahay ng biktima na nakikipag-inuman sa kanyang mga kaibigan sa selebrasyon ng kanyang kaarawan.
Dahil sa pawang mga lasing at makukulit na, nagkaroon umano ng pagtatalo sa pagitan ni Fortez at isa pang bisita.
Agad namang umawat ang may kaarawan na si Bingza ngunit siya ang pinagbalingan ni Fortez.
Bigla umanong bumunot ng balisong ang suspek at sunud-sunod na inundayan ang biktima saka mabilis na tumakas.
Agad namang tinulungan ng mga kaanak ang biktima na naisugod sa pagamutan.
- Latest
- Trending
