Bodyguard ni Tac Padilla, tinodas sa lamayan

MANILA, Philippines - Patay ang bodyguard ng na­tional pla­yer ng Pilipinas sa “shooting” ma­karaang pagbabarilin ng tatlong hindi nakilalang salarin habang nakikipag­l­a­may sa Malabon City kahapon ng madaling araw.

Nagtamo ng mara­ming tama ng bala ng kalibre .45 at .9mm pis­tol na mga baril ang biktimang si Ernesto Baybay, alyas Estong, 41, at dating residente ng no. 112 C. Perez St., Brgy. Tonsuya. Nabatid na bodyguard si Baybay ni Nathaniel “Tac” Padilla na siyang may-ari naman ng Malabon Soap and Oil Corp.

Sa ulat ng Malabon City Police, naganap ang krimen dakong alas-2:30 kahapon ng madaling-araw sa isang burol sa kapitbahay ni Baybay sa C. Perez St. Nakaupo si Baybay nang biglang lapitan ng tatlong salarin at agad na bistayin ng bala.

Ayon sa isang saksi, nagtangka pa umanong bumunot ng baril ang biktima ngunit hindi na ito nakaganti ng putok. Tinangay pa ng mga salarin ang baril ng biktima saka mabilis na tumakas.

Isinugod pa ng mga kapitbahay si Baybay sa Tondo Medical Center ngunit hindi na ito umabot ng buhay.

Patuloy naman nga­yon ang isinasagawang imbestigasyon ng pulis­ya upang mabatid ang motibo ng krimen at pagkakakilanlan ng mga salarin.