Pinagtaksilan ng gf, binata nagbigti

 MANILA, Philippines - Hindi na nakayanan ang labis na pighating nararam­daman matapos na mahuling may ibang lalaki ang kanyang kasintahan kung kaya ipinasya ng isang lalaki na tapusin ang kanyang buhay sa pamamagitan ng pagbibigti sa sarili sa loob mismo ng tinutuluyang bahay sa Quezon City.

“Niloko niya ako mama kaya ko nagawa ito. Sorry kuya, ate, apo at mga pamangkin,” ang ilan lamang sa mga ka­tagang nakasaad sa suicide note na iniwan ni Perfecto Mengo­rio, 29, matapos na magbigti sa loob ng kanyang bahay sa Upper Gulod, Brgy. Sauyo, Novaliches sa lungsod.

Si Mengorio ay nadiskubre ng kanyang inang si Aling Virginia habang nakabitin sa kisame ng kanyang kuwarto ganap na alas-3:15 ng hapon.

Bago ito, sinasabing makailang ulit na kinatok ni Aling Virginia ang kuwarto ng anak subalit hindi ito sumasagot, hanggang sa magpasya siyang tawagin ang apong si John Vincent Carlogan para akyatin ang bintana nito.

Nang makapasok si Carlogan ay tumambad sa kanya ang katawan ng biktima habang nakabitin sa kisame.

Nakasaad pa sa nakitang suicide note na nagawa niyang magpakamatay makaraang mahuling may ibang lalaki ang kanyang kasintahan.

“Hindi kita mapapatawad, dadalawin kita habambuhay Ravina­. Nag-apply ako ng trabaho para sa’yo, ano ginawa mo? Pumunta ako sa inyo tapos madadatnan ko na may kasama kang iba,” sabi pa sa suicide note ng biktima.