3 parak sugatan mobile car, niratrat

MANILA, Philippines - Sugatan ang tatlong pulis matapos tambangan ng isang armadong grupo ng kalalakihan habang nakasakay sa isang mobile patrol car kahapon ng umaga sa Caloocan City.

Nilalapatan ng lunas sa Commonwealth Medical Center ang mga biktimang sina PO3 Edmund Bueno; PO2 Chilbert Ofalla at PO2 Don Enrico Mendoza, nagtamo ng ilang tama ng bala sa kani-kanilang katawan.

Samantala, nakaligtas naman ang isa pang kasamahan ng mga biktima na si PO2  Joel Pinon.

Sa sketchy report ng pulisya, naganap ang insidente dakong alas-10:00 ng umaga sa Waling-Waling St., Maligaya Park, Brgy. 177, Camarin, Caloocan City North habang sakay ang mga biktima ng isang police mobile patrol car at nagpa­patrulya sa nabanggit na lugar nang biglang sumalakay ang mga suspek at walang sabi-sabing pinaulanan ng bala ang naturang mga alagad ng batas.

Matapos ang insidente ay tumakas ang mga suspek habang dinala ang mga sugatang biktima sa nasabing ospital.

Isang malalimang imbestigasyon ang isinasagawa nga­yon ng pulisya, hinggil sa insidente.