MANILA, Philippines - Nadakip sa follow-up operation ng Pasay City Police ang dalawang kilabot na holdaper na nambiktima at itinuturong dahilan ng pagkasawi sa isang empleyado ng Pasay Health Office kamakailan.
Kinilala ang mga naaresto na sina Leo Navarra, alyas Leo, 28, miyembro ng Sputnik Gang; at Robert Espidion, alyas Tata, 32, miyembro naman ng Batang City Jail at kapwa residente ng Brgy. Sto. Niño, ng naturang lungsod.
Ang dalawa ay sinasabing responsable sa panghoholdap kay Restituto Cruz, 41, nurse at tauhan ng Pasay City Health Office. Sa ulat ng pulisya, nabatid na sakay ang biktima ng isang pampasaherong jeep sa may EDSA-Malibay patungo sa Makati City dakong alas-8:30 ng gabi noong nakaraang Biyernes nang holdapin ng dalawang suspect.
Nagawa pang makapiglas at makatakbo ang biktima ngunit nadapa ito sa kalsada kung saan nabagok ang ulo. Agad namang sinaklolohan ng mga taong nakasaksi ang biktima at isinugod sa Pasay City General Hospital ngunit nalagutan din ng hininga makaraan ang apat na araw nitong Setyembre 11.
Itinuro naman ng isang saksi ang mga suspek sa police photo gallery kaya agad nagsagawa ng manhunt operation ang Pasay Police na naging dahilan sa pagkakadakip ng dalawang suspek. Nabatid na isa pang kasabwat ng mga ito ang patuloy na nakakalaya at target ng manhunt ng pulisya.