MANILA, Philippines - Patay ang binatang probinsiyano na kaluluwas lang ng Maynila matapos barilin ng tatlong siga sa kanilang lugar habang nagyoyosi sa tapat ng tinutuluyang bahay sa Caloocan City kamakalawa ng gabi.
Dead-on-arrival sa President Diosdado Macapagal Memorial Medical Center sanhi ng mga tama ng bala sa katawan ang biktimang si Ronilo Tabuso, 23, ng Sabalo St., ng lungsod na ito.
Pinaghahanap naman si alyas Barok at dalawang hindi pa kilalang kasama nito.
Sa imbestigasyon ng Caloocan CIty Police, nabatid na alas-11:00 ng gabi nang maganap ang insidente habang nagsisigarilyo sa tapat ng tinutuluyang bahay ang biktima nang pagbabarilin ng mga suspek.
Matapos ang insidente ay tumakas ang mga suspek habang dinala naman ang biktima sa nabanggit na ospital.
Posible umanong pinagtripan ang biktima ng mga suspect na siga dahil sa dayo sa lugar.
Nabatid na galing probinsiya ang biktima at lumuwas lamang ng Maynila upang maghanap ng trabaho.