Maid nalunod sa pool, dedo

MANILA, Philippines - Isang kasambahay ang nasawi matapos na malunod habang lumalangoy sa swimming pool ng kanyang amo sa lungsod Quezon kahapon.

Ang biktima ay kinilalang si Mary Jane Dolores, 20, nanunuluyan sa #22 Amsterdam St., Vista Real Sub­division, Brgy. Old Balara.

 Sinasabing patay na ang biktima nang matagpuan sa swimming pool ng pamilya Ong sa nasabing lugar ganap na alas-7:30 ng umaga.

Ayon kay PO3 Loreto Tigno, may hawak ng kaso, bago ang pagkakadiskubre sa bangkay, nakita umano si Dolores na lumalangoy sa may limang talampakang lalim ng pool, ganap na alas-7 ng umaga. 

Sinabi ni Wilyn Pagbanua, 40, kasama ng biktima, nagsimulang maging kasambahay si Dolores sa pamilya Ong nito lamang Huwebes.

Bagama’t bago lamang naninilbihan bilang katulong, walang alinlangang lumusong ito sa swimming pool habang natutulog pa ang kanilang amo.

Dahil dito, nagpasya si Pagbanua na iwan si Dolores at gawin ang kanyang trabaho. Ilang minuto, pagka­balik ni Pagbanua ay napuna niyang nawawala na ito, hanggang sa makita itong palutang-lutang sa pool.