P5-M napinsala sa Rizal Park

MANILA, Philippines - Sa loob ng tatlong araw, umaabot sa P5 milyon ang kabuuang halaga ng napinsala   sa Rizal Park  matapos ang paghagupit ng hanging Habagat.

Ayon kay National Parks Committee Executive Director Juliet Villegas, mula sa 52 ektaryang lupain ng Luneta  naapektuhan dito  ang may limang ektarya.

Sinabi ni Villegas na  aabutin­ ng isang buwan ang pagsasaayos ng Rizal Park bago ito maibalik sa dating kagandahan.

Dagdag  pa ni Villegas, isang linggo naman ang gugugulin nila sa paglilinis sa tambak na basura at kapal ng putik na tumambad sa Luneta.

Ani Villegas, hindi biro ang tambak ng basurang naiwan ng baha kung kaya’t kailangan ang puspusang paghakot nito.

Nabatid na kahapon lang din nagsimula  ang paglilinis sa Luneta dahil gumanda na ang panahon at humupa na ang tubig-baha dulot ng Hanging Habagat  kung saan umabot hanggang dibdib  ang pambansang pasyalan.