Bangkay ng paslit natagpuan sa QC

MANILA, Philippines - Isang naagnas na bangkay ng anim na taong gulang na batang lalaki na umano’y biktima ng pagkalunod sa nakaraang pagbaha ang natagpuang palutang-lutang sa ilog malapit sa Bagong Silangan sa lungsod Quezon kahapon.

Kinilala ang biktima na si Ronel Carson, ng Clemencia St, Barangay Bagong Silangan sa lungsod.

Si Carson ay iniulat na nawala noong August 7 sa kasagsagan ng pagbuhos ng ulan makaraang makabitaw sa pagkakahawak sa kanyang nanay habang nire-rescue sakay ng isang life boat sa Clemencia st., sa naturang barangay.

Sinasabing August 7, ganap na ala-1 ng hapon nang malunod ang bata sa Clemencia st., habang pilit na inililigtas sa malakas na agos ng tubig at makabitaw.

Ayon sa Department of Public Order and Safety (DPOS), ang biktima ay kasama sa siyam katao na ni-rescue sa nasabing lugar sakay ng life boat, subalit tumagilid at tumaob ang sasakyan makaraang iwasan nito ang kuryente.