Holdaper kulong sa matapang na dalaga

MANILA, Philippines - Kulungan ang binagsakan ng isang kilabot na holdaper makaraang lakas-loob na labanan ng isang dalaga at agad na nakahingi ng tulong sa pulisya, kahapon ng madaling-araw sa Caloocan City.

Nakilala ang na­dakip na holdaper na si Jonathan Medina, 25, ng Sitio 6 Brgy. Catmon, Malabon City habang inaalam pa ang pagkakakilanlan ng tumakas nitong kasama.

Sa ulat ng Caloocan City Police, naganap ang panghoholdap dakong alas-2 ng mada­ling araw habang mag-isang naglalakad na pauwi ang biktimang si Marivic Sanchez sa may Benin St., sa may Monumento.

Agad umanong tinutukan ng patalim ng mga salarin ang biktima at sapilitang kinuha ang bag nito na naglalaman ng pera, cellphone at iba pang mahalagang gamit bago agad na tumakas matapos pagbantaan na tuluyang sasaksakin kapag humingi ng tulong.

Hindi naman nagpatalo sa takot si Sanchez na agad na tumakbo sa isang nakaparadang police mobile car at humingi ng responde. Agad namang hinabol ng mga pulis ang dalawang suspect na naghiwalay ngunit nasukol ang suspect na si Medina.

Nanawagan naman ang pulisya sa iba pang biktima ng panghoholdap sa Mo­numento na magtungo sa kanilang istasyon upang kilalanin ang suspect at sampahan pa ng kaukulang kaso.