MANILA, Philippines - Natimbog ng mga operatiba ng Philippine Drug Enforcement Agency (PDEA) ang isang 21-anyos na criminology student matapos ang ginawang buy-bust operation, kamakailan.
Kinilala ni PDEA Director General Undersecretary Jose S. Gutierrez, Jr. ang suspect na si Gabaliel M. Baje, alyas Jong-Jong, 3rd year criminology student at varsity player ng basketball sa Zamboanga del Norte. Nakumpiska sa kanya ang isang plastic sachet ng shabu na inabot niya sa isang PDEA agent na nagsilbing poseur buyer. Sinasabing kilala si Baje sa pagtutulak ng iligal na droga sa probinsya ng Zamboanga del Norte, partikular sa siyudad ng Dipolog at Dapitan.
Nakumpiska din kay Baje ang dalawa pang plastic sachets ng shabu, isang unit ng mobile phone, at isang XRM motorcycle (2161-JR). Sabi pa ni Gutierrez, isang buwan ding tinugaygayan ng mga operatiba ng PDEA sa Zamboanga si Baje bago ito bumagsak sa kanilang mga kamay.