MANILA, Philippines - Sa hindi inaasahang pagkakataon ay napatay ang 32-anyos na misis ng kanyang ka-live-in na pulis matapos mabaril sa loob ng kanilang bahay sa Quezon City kamakalawa ng hapon.
Kinilala ni P/Chief Inspector Rodel Marcelo, hepe ng Quezon City PNP District Criminal Investigation and Detection Unit (QCPD-CIDU) ang biktima na si Nenita Pediga Fernand.
Namatay habang ginagamot sa East Avenue Medical Center ang biktima na tinamaan ng bala ng baril sa kanang tiyan.
Sumuko naman ang suspek na si PO3 Arsenio Gardon, 42, nakatalaga sa himpilan ng pulisya sa Makati City.
Ayon kay SPO1 Rafael de Peralta ng QCPD-CIDU, naganap ang insidente dakong alas-5:30 ng hapon sa loob ng bahay ng magka-live-in sa #159 Pook dela Paz, Brgy. Old Balara.
Lumilitaw na nagdidiskarga ng bala ng baril ang pulis nang biglang pumutok ito kung saan tinamaan ang natutulog na biktima sa kanilang kuwarto sa unang palapag ng bahay.