P10-M puslit na bigas nasabat

MANILA, Philippines - Walong 20-footer container van na nagla­laman ng tina­tayang P10-milyong halaga ng smuggled na bigas ang nasabat ng mga tauhan ng Bureau of Customs (BOC) mula sa China.

Iprinisinta kahapon sa media ni Customs Commissioner Ruffy Biazon na lumalabas umanong consignees na Seph Gabrielle En­ter­prises at Afidee Trading­ na pawang idinekla­rang aluminum frames at kitchen wares ang mga kargamento.

Nadiskubre sa nasabing mga van ang 4,000 sako ng bigas na kamakailan lamang umano dumating sa Port of Manila.

Una rito, may nauna nang nasabat na imported na sibuyas na sinasabing smuggle na nagkakahalaga ng P2.8-milyon mula rin sa bansang China.

Samantala, sinabi ni Deputy Commissioner Horacio Suansing, na inilagay nila sa alerto ang nasabing shipment makaraang matanggap ng kanilang mga tauhan ang kahina-hinalang address ng dalawang consignees.

Nilinaw ng Bureau na hindi pa pinapayagan ang impor­tasyon ng bigas sa bansa upang bigyan ng pagkakataon ang mga lokal na magsasaka na kumita, maliban na lamang kung may kautusang magmumula sa National Food Autho­rity o kaya ay may kompanya o negos­yanteng awtorisado sa pag-importa ng bigas.