Away bata nauwi sa away matanda: 1 patay

MANILA, Philippines - Nauwi sa pagkasawi ng isang ama ang pakikipag-away nito sa isa ring ama makaraang kapwa patulan ang away-bata ng kani-kanilang mga anak, kamaka­lawa ng gabi sa Las Piñas City.

Namatay kaagad sanhi ng mga tinamong saksak sa iba’t ibang bahagi ng katawan si Elpidio Ibero, 55, pedicab driver at residente ng Villa Alfonso, Pulanglupa 1 habang mabilis namang tumakas ang suspect na si Pascual Zorbio, 37, kapitbahay ng nasawi.

Sa ulat ng Las Piñas City Police, nakikipag-inu­man ang biktima sa kap­wa pedicab driver na si Joaquin Abucay, 38 sa kanilang lugar dakong alas-8 ng gabi nang dumating ang suspek at sinita si Ibero sa ginawa umanong pagkampi sa anak nang maka-away ang kanya ring anak.

Humantong umano sa mainitang pagtatalo ang pa­ninita ng suspek na agad na nagbunot ng patalim at su­nud-sunod na inundayan ang kapitbahay saka mabilis na tumakas dala ang pata­lim na ginamit sa krimen.

Pansamantalang inilagak ang bangkay ni Ibero sa Me­­sina Funeral Homes habang inilunsad na ng pu­lisya ang pagtugis sa salarin.