MANILA, Philippines – Maglagay ng bandila at iwagayway, gunitain ang mga bayaning nagsakripisyo para sa kasarinlan ng bayan natin.
Panawagan ito ni Manila Mayor Alfredo S. Lim sa mga Manilenyo kasabay ng pagtanggap niya kahapon ng donasyong mga bagong watawat ng Pilipinas na ipamamahagi sa may 71 public elementary at high schools ng lungsod.
Ang nasabing mga bandila ay itinaon naman ng grupo ng donor mula sa Chinese-Filipino Business Club, Inc. (CFBCI) sa nalalapit na pagdiriwang ng 114th Independence Day sa Hunyo 12.
Malugod namang nagpasalamat si Lim sa CFBCI officials na pinangunahan ng pangulo nitong si Cristino Lim, Vice presidents Lao Giok Chiao at Johnny Lee.
Hinimok din ni Lim ang mga tanggapan, maging ang mga pribado at kani-kanilang kabahayan at sasakyan na magdisplay din ng bandila ng Pilipinas.
Kasabay nito, nagpalabas na rin ng advisory ang United States Embassy na sarado sa anumang transaksyon ng kanilang tanggapan sa Martes (Hunyo 12) bilang pagbigay-galang sa Araw ng Kasarinlan ng bansa.