Manila, Philippines - Mistulang buko na biniyak ang ulo ng isang rider makaraang mapagkamalan ng isang guwardya na magnanakaw ito sa isang patahian sa Pasig City, kahapon ng madaling-araw.
Dead-on-the-spot ang biktima na kinilalang si Froilan Sarmiento, 28, ng City Delivery sa Makati City at naninirahan sa #1133 Interior F. Antonio St., Brgy. Bambang, Pasig City.
Sumuko sa mga awtoridad ang suspek na si Nicolas Portal, 50, may-asawa, ng Gregorio Sualog David Security Agency at nakatalaga bilang guwardya sa Crismer Inc., isang patahian sa P. Alvarez St., Brgy. Bambang ng nasabing lungsod.
Nabatid na ang insidente ay naganap dakong alas-3:45 ng madaling-araw sa loob ng binabantayang patahian ni Portal.
Sa testimonya ng guwardya, nagising siya na nasa loob na ng patahian ang biktima at inambaan umano siya ng itak at sinabihan na baril ang kanyang kailangan.
Nanlaban umano siya hanggang maagaw nito ang itak at doon pinagtataga ang biktima kung saan ay nabiyak ang ulo at halos matanggal ang braso nito.
Nagsasagawa ngayon ng masusing imbestigasyon ang pulisya para matukoy ang tunay na dahilan ng krimen.