MANILA, Philippines - Inaresto ang isang buntis matapos na holdapin nito ang isang kahera at nanakot pa na magpapasabog ng bomba sa isang foodchain sa Mandaluyong City, kamakalawa ng gabi.
Kinilala ang inarestong buntis na si Carol Legazpi, 23, tubong Mindoro at pansamantalang nanunuluyan sa Block 39 Welfareville Compound, Brgy. Addition Hills sa lungsod.
Si Legaspi ay dinakip dahil umano sa panghoholdap nito kay Zyra Apigo, 21, dalaga, cashier ng isang fastfood chain at nakatira sa Blk. 28 Sitio Lumbak Creekside, Taytay Rizal.
Base sa ulat ng pulisya, dakong alas-7:30 ng gabi nang maganap ang panghoholdap sa biktima sa loob ng cashier both na matatagpuan sa Boni Ave., Brgy. Barangka Mandaluyong City.
Inaasikaso umano ng biktima ang tatlong kostumer nang mapansin nito ang suspek na pabalik-balik at kakaiba ang kilos.
Nilapitan umano ng biktima ang suspek at tinanong kung ano ang order nito ngunit hindi umano sumagot, at nang matapos ang tatlong kostumer ay bigla na lamang lumapit ang suspek at nagdeklara ng holdap.
Agad namang nakahingi ng tulong ang biktima sa iba pa niyang kasama sa trabaho kaya nadakip ang buntis.