MPD chief binalaan ang mga kawatan na tandem

MANILA, Philippines - Nagbabala si Manila Police District (MPD) director General Alejandro Gu­tierrez sa mga riding-in-tandem na susubok na mangholdap at mag-snatch sa Maynila na maaaring manganib ang kanilang buhay kung matitiyempuhan sila ng nakatalagang Tactical Motor­cycle Riders (TMR) na pantapat sa kanila ng Philip­pine National Police (PNP).

Ani Gutierrez, malamang na mauwi sa engkwentro at mauwi sa kamatayan kung maaktuhan ng mga nag-iikot na TMR units (riding-in-tandem na armadong kagawad ng PNP) sa lungsod ang riding-in-tandem na mga kriminal.

Bagamat wala nang ga­anong napapaulat sa lung­sod na mga krimeng sangkot ang riding-in-tandem nitong nakalipas na buwan, mayroon pa­ilan-ilan tulad ng reklamong inihain ng isang Overseas Filipino Worker (OFW), na dinikitan ng riding-in-tandem habang naglalakad malapit sa P. Burgos St., Ermita, Maynila, alas-7:00 ng gabi ng Huwebes.

Lulugu-lugo ang bikti­mang si Ricardo Tiongson, 39, ng Brgy. Tabang, Plaridel, Bulacan dahil hinablot sa kanya ang dalang bag na nagla­laman ng kanyang pasaporte, lap top computer, tiket sa eroplano at halagang $1,000 ng riding-in-tandem sa hindi naplakahang motorsiklo na kulay puti.