MANILA, Philippines - Dayaan ang sinasabing naging dahilan kung kaya sinaksak ng isang binata ang kanyang nakalaro sa tong-its kamakalawa sa Navotas City.
Nasa kritikal na kondisyon at ginagamot sa President Diosdado Macapagal Memorial Hospital ang biktimang si Glenn Lines, 27, ng Block 3, Pamasawata St., Dagat-Dagatan, Brgy. 28, Caloocan City sanhi ng tinamong mga saksak sa ibat-ibang bahagi ng katawan.
Sa inisyal na imbestigasyon ng Station Investigation Division (SID), Navotas City Police, naganap ang insidente dakong alas-2:00 ng hapon sa Sawata St., Brgy. San Rafael Village ng nabanggit na lungsod.
Nabatid na naglalaro ng tong-its ang biktima at suspek at pagkalipas ng ilang sandali ay nagkaroon na ng mainitang pagtatalo ang mga ito hanggang sa bumunot ng patalim ang suspek at inundayan ng ilang saksak ang biktima.
Matapos ang insidente ay mabilis na tumakas ang suspek at ang biktima naman ay dinala ng ilang kapitbahay sa naturang pagamutan.