MANILA, Philippines - Napaslang ang magka-live-in matapos pagbabarilin ng mga hindi nakilalang lalaki sa piyestahan sa Barangay Malanday, Marikina City kamakalawa ng gabi. Kinilala ng pulisya ang dalawa na sina Graciano Cariño, 40; at Monica Garcia, 39, kapwa naninirahan sa #17 A. Dela Paz St., Pasig. Sa inisyal na ulat ng Marikina City PNP, naganap ang pamamaril dakong alas-5:15 ng hapon sa panulukan ng Reposo St. at Kabayani Road. Nabatid na dumalo sa piyestahan sa isang kaibigan ang dalawa kung saan matapos na kumain ay nagpaalam na ito. Subalit nang pasakay na ng motorsiklo ay nilapitan at niratrat ang dalawa. Sinisilip ng pulisya ang anggulong sigalot sa bawal na droga ang isa sa motibo sa pamamaslang dahil sa sinasabing nasangkot sa bawal na droga si Garcia.