794 inmates ng MCJ nagparehistro sa Comelec

MANILA, Philippines - Tiniyak ng  Manila City Jail (MCJ) na maka­boboto na sa  May 2013 elections ang  mga in­mate dito matapos na isagawa ang  registration na sinaksihan ng mga opisyal  ng  Commission on Elections (Comelec) at barangay.

Ayon kay MCJ Warden Sr. Supt. Ruel Rivera, umaabot sa 794 inmates ang nakapagparehistro at handa nang iboto ang kanilang mga pagkaka­tiwalaang mamumuno sa bansa sa susunod na taon. Sinabi  ni  Rivera na 1116 pang mga inmates ang nakatakdang  magparehistro sa susunod na buwan. Umaabot sa 1910  ang registrants ng MCJ.

Nabatid na ang mga detainees ay kinabibilangan ng  513, District 1; 376, District 2;  304,  District 3; 255, District 4; 291, District 5; at 171 sa District 6. Paliwanag ni Comelec Commissioner Rene Sarmiento, may karapatan pa rin ang mga inmates na bumoto at hindi maaaring ipagkait ito sa kanila. Kasama ni Sarmiento sina Atty. Jubil Surmieda, Director III, Comelec NCR Atty. Rafael Olano, Asst. Director Comelec NCR at Brgy. Chairman Thelma Lim ng Brgy. 310 Zone 31.