100 kabahayan nasunog

MANILA, Philippines - Isang lalaki ang patay makaraang ma-suffocate sa sunog na lumamon sa may 100 kabahayan sa lungsod Quezon kahapon ng hapon.

Kinilala ni Supt. Bobby Baruelo, hepe ng Quezon City Fire Station ang nasawi na si Andy Gonzales, 40, ng #3 West Riverside, Brgy. Damayan sa lungsod.

Sinasabing si Gonzales ay hindi na nakalabas pa sa lugar na nasusunog na kabahayan matapos na matrap sa isang dead end na kalye malapit sa chapel ng nasabing barangay.

Sa kasalukuyan, wala pang maibigay na detalye si Baruelo kung kaninong tahanan nagsimula ang apoy, dahil patuloy ang ginagawa nilang mopping operation.

Nagsimula ang sunog ganap na alas-3:45 ng hapon nang bigla na lamang maglagablab sa isang tahanan dito. Dahil pawang mga gawa lamang sa light ma­terials ang bahay ay mabilis na kumalat ang apoy hanggang sa umabot ito sa Task Force Alpha.

Ganap na alas-4:40 ng hapon nang ideklarang fire undercontrol ang sunog habang patuloy ang ginagawang pagsisiyasat dito.