MANILA, Philippines - Dala ng matinding kalasingan, isang 40-anyos na mister ang nalunod matapos mahulog sa creek habang umeebak kahapon ng umaga sa Sampaloc, Maynila.
Ayon kay SPO3 Benito Cabatbat, imbestigador ng Manila Police District-Homicide section, nakilala ang nasawi na si Alberto Billeza ng Florentino Cayco, Loyola, sa nasabing lugar.
Nabatid na dakong alas-9 ng umaga nang matagpuan ng ilang concerned citizen ang bangkay ng biktima sa creek sa Lacson St. malapit sa panulukan ng Loyola Street.
Huling namataan ang biktima na umiinom ng alak dakong alas-2 ng hapon kamakalawa.
Ayon sa pulisya, posibleng nagtungo ang biktima sa creek upang umebak dahil nakababa pa ang pantalon nito nang mawalan ng balanse sa sobrang kalasingan at nag-dive sa maruming ilog.
Agad namang ipinagbigay-alam ang insidente kay Chairwoman Remedios Santos ng Barangay 461 Zone 45 Dist.4 kung saan kinontak naman ang pulisya.