MANILA, Philippines - Napaslang ang dalawa-katao habang nasa kritikal namang kalagayan ang 16-anyos na babae matapos pagbabarilin ng riding-in-tandem sa Valenzuela City kamakalawa ng madaling-araw.
Kinilala ng pulisya ang dalawang napatay na sina Michael Villasenor, tricycle driver, 26, ng Sta. Lucia Subdivision sa Viente Reales ng nabanggit na lungsod; at Jonathan Obaña, 42, OFW, namatay habang ginagamot sa Meycauayan Doctor’s Hospital.
Tinamaan naman ng ligaw na bala sa kanang bahagi ng katawan si Joan Convicto.
Samantala, tugis naman ng pulisya ang suspek na si Gerard Ferdinand Joson, 40; at isang hindi pa kilalang kasama na tumakas lulan ng motorsiklo.
Base sa police report, naganap ang pamamaril dakong alauna ng madaling-araw kung saan nag-aabang ng pasahero si Villaseñor sa nasabing lugar.
Nabatid na si Villasenor ay testigo sa pamamaril ni Joson sa kanyang kaibigang si Michael Thakursing noong Agosto 11, 2011. Nang mabuhay si Thakursing ay pilit silang inaareglo ni Joson subalit tumanggi ang magkaibigan hanggang sa maganap ang pamamaril.