Holdaper itinumba ng 3 pulis

MANILA, Philippines - Hindi na pinaporma pa ng pulisya ang ’di kilalang lalaki na sinasabing holdaper matapos mabaril sa Quiapo, Maynila kahapon ng umaga.

Kasalukuyang bine­be­ripika ni SPO2 Glenzor Vallejo ng MPD-Homicide Section ang pagkakakilanlan ng lalaki na nasa edad  35-40, 5’6’’ ang taas, pinaniniwalaang miyembro ng Sputnik Gang dahil sa tattoo ng cobra sa dibdib, nakasuot ng asul na maong shorts, itim na medyas, rubber shoes at naka t-shirt na puti.

Lumilitaw na sinita ni P/Insp. Armand Macaraeg, kasama sina PO1 Mark Jason Paez at PO1 Aljimar Ammar ang lalaki dahil sa mistulang nag-aabang ng mabibiktima at hindi mapakali sa pagsulyap sa mga paparating na tao habang nakatambay sa panulukan ng Nepomuceno at Legarda Streets.

Sinubukang kapkapan ng tatlong pulis upang rekisahin ang nakabukol sa beywang subalit binunot nito ang baril at nagtangkang manlaban.

Dito na agad na binaril ng grupo ni Macaraeg ang ’di-kilalang lalaki kung saan tinamaan sa ulo at pisngi.