MANILA, Philippines - Nagpakamatay sa pamamagitan ng pag-inom ng silver cleaner ang isang 17-anyos na tomboy matapos makipagkalas ang girlfriend sa Tondo, Maynila, kahapon ng madaling-araw.
Idineklarang patay sa Gat Andres Bonifacio Memorial Medical Center si Charmaine Elvira Villarba, ng Aguila St., Tondo at crew sa isang burger stand.
Sa ulat ni PO3 Bernardo Cayabyab ng Manila Police District-Homicide Section, dakong alas-12:08 ng madaling-araw nang madiskubre ang pag-inom ng nasabing kemikal ng biktima sa loob ng isang silid sa Conchita St., Tondo.
Ito’y matapos lamang umanong makipagtalo sa kanyang girlfriend na si Maricar Gaston, 19, kasamahan sa trabaho ng una hinggil sa umano’y plano ng una na umalis na ito sa trabaho dahil maliit ang kanilang suweldo.
Pilit umanong isinasama ng nasawi si Maricar subalit tumanggi ang huli na nagresulta sa kanilang mainitang pagtatalo at humantong sa kanilang break-up.
Hindi umano nagtagal, nakita na lamang ng isang bata na may iniinom ang biktima at isinumbong ito kay Maricar.
Nang puntahan ay nakitang bumubula ang bibig nito kaya agad na dinala sa nasabing pagamutan kung saan sinubukang iligtas subalit agad ding binawian ng buhay.