Dress shop manager, ginilitan ng call boy

MANILA, Philippines - Hinihinalang isang call boy ang pumatay sa manager­ ng isang dress shop makaraang ma­tagpuan itong du­guan dulot ng pagkakagilit ng leeg at mga saksak ng patalim sa dibdib sa loob ng isang motel, kamakalawa ng gabi sa Pasay City.

Nakilala lamang sa pamamagitan ng na­tagpuang identication card ang biktimang si Emmanuel Tanchico, 25, at may provincial address sa Puerto Prin­cesa, Palawan.

Sa inisyal na ulat ng Pasay City Police, dakong alas-7 ng gabi nang ma­tagpuan ng mga opisyal ng barangay ang bangkay ng biktima sa loob ng Room 12 ng Galaxy Lodge sa 2245 Taft Avenue, ng na­turang lungsod.

Ayon sa roomboy na si Daniel Ponce, 41, nag-check-in dakong alas-5 ng hapon ang biktima kasama ang isa pang lalaki na hinihinalang call boy sa naturang kuwarto. Bandang alas-6:30 ng gabi nang marinig niyang may humihingi ng tulong kaya kanyang kinatok ang kuwarto ngunit hindi siya pinagbuksan.

Dito na humingi ng tulong sa mga opisyal ng barangay si Ponce kung saan puwersahang binuksan ang pinto ng kuwarto. Dito tumambad sa kanila ang duguang bangkay ng biktima habang wala na ang lalaking kasama nito na hinihinalang nakasalisi sa pagtakas.

Ayon sa pulisya, ma­aaring hindi nagkasundo sa bayaran ang dalawa na naging dahilan ng kanilang pagtatalo at ugat ng krimen. Inaalam rin naman ng pulisya kung pinagnakawan ang biktima.