Bumastos sa puntod nina Ninoy at Cory, kilala na

MANILA, Philippines - Kilala na ng pulisya ang suspek na bumastos sa puntod ng mga magulang ni Pa­ngulong Benigno “Noynoy” Aquino III noong nakaraang Disyembre 25 sa Parañaque City.

Kinilala ang suspek na si Mariano Alganion, taga-Sta. Rosa, Laguna.

Base sa rekord ng pu­lisya, nabatid na noong Disyembre 25 ay ginasgas at binuhusan pa ng grasa ang puntod nina dating Senador Benigno “Ninoy” Aquino Jr. at da­ting Pa­ngulong Corazon Aquino, sa Manila Memorial Park, Parañaque City.

Ayon kay Sr. Supt. Billy Beltran, hepe ng Para­ñaque City Police, na­tukoy nila ang suspek base sa rekord hinggil sa insi­dente noong Oktubre 31, ng taong kasaluku­yan, na dina­kip ang nasabing suspek ng Presi­dential Security­ Group nang tangkain nitong lumapit sa Pa­ngulo para iabot ang mga hawak nitong dokumento.     

Sinabi ni Beltran na sa­sampahan­ nila ng kasong malicious mischief si Alganion dahil sa ginawang pambababoy sa puntod ng mga magulang ng Pa­ngulong Aquino.