MANILA, Philippines - Isa na namang sangay ng LBC Remittance Center ang hinoldap ng dalawang lalaki na armado lang naman umano ng ‘toy gun’, sa Sta. Mesa, Maynila.
Sa ulat ng Manila Police District-Station 8, dakong alas-9:00 ng gabi nang maganap ang insidente sa LBC-Sta. Mesa Branch, sa panulukan ng Magsaysay Blvd. at Santos Extn., Sta Mesa, Maynila.
Ayon kay Linder Mista, customer associate ng branch, nagsasara na ang kanilang tanggapan habang ipinapasok umano ang mga padala na idinidiskarga sa ibang lugar mula sa isang van, nang biglang sumalisi papasok ang dalawang lalaki.
Nagdeklara ng holdap at inutusan umano silang dumapa at binuksan ang drawer at kinuha ang laman na nagkakahalaga ng P130,000 cash.
Nang magsitakas na ang dalawang suspect, naiwan ang baril na ginamit na natuklasang isa palang baril-barilan at surgical mask na pantakip sa mukha.
Nitong nakalipas na Miyerkules ay naholdap din ang LBC Branch sa loob ng Robinson’s mall sa Fairview QC at noong nakalipas na mga buwan, ilang sangay sa Nueva Ecija, Samar at Sorsogon din ang hinoldap.