MANILA, Philippines - Inatake sa puso ang isang miyembro ng PNP na nakatalaga sa Camp Crame, Quezon City habang sakay sa kaniyang motorsiklo sa bahagi ng Ermita, Maynila kahapon ng madaling-araw. Hindi na umabot ng buhay sa Ospital ng Maynila si PO3 Romeo Mendoza, Sr., 50, ng Block 24, Lot 17 Blue Seal Sto, Tomas, Batangas at nakatalaga sa Police Security and Protective sa Camp Crame, Quezon City. Dakong alas-4:00 ng madaling-araw nang maganap ang insidente, malapit sa Finance building sa Maria Orosa St., Ermita, Maynila. Napansin siya ng isang Romualdo Reyes, na bumagsak kaya ipinabatid sa nagpapatrulyang pulis na nagdala sa pagamutan.