Vendor nakasagi ng lasing, inutas

MANILA, Philippines - Matapos magkasagian, isang fish ball vendor ang binaril at napatay ng isang lalaki kamakalawa ng gabi sa Valenzuela City.

Dead-on-arrival sa Polo Hospital ang biktimang si Jayson Villanda, 28, ng Veinte Reales ng nabanggit na lungsod.

Pinaghahanap naman ang suspect na nakilalang si Paterno Cabelangan Jr. alyas “Pusa”, 29, ng Santo Rosario, Valenzuela City.

Sa inisyal na ulat, naganap ang insidente dakong alas-9:00 ng gabi, malapit sa bahay ng biktima. Kapwa lasing umano nang magkasalubong ang dalawa at nagkasagian sa makipot na kalsada.

Dito nagkaroon ng mainitang pagtatalo ang dalawa hanggang sa binunot ng suspect ang dalang baril at saka binaril sa leeg ang biktima at pagkatapos ay mabilis na tumakas. Patuloy ang paghahanap sa suspect.