Driver sinumpak sa harap ni misis

MANILA, Philippines - Isang 35-anyos na tri­cycle driver ang anim na beses na pinaputukan ng sumpak sa harap ng kanyang misis, sa Port Area, Maynila, kahapon ng umaga.

Kinilala ni P/Sr.Insp. Joey de Ocampo ang biktimang si Joselito Handog Tapin alyas “Dodong, ng Row 16, Unit 5 Block 4, ng Habitat for Humanity, Baseco Compound, Port Area.

Inilarawan lamang ang salarin na may taas na 5’4’’, nasa edad na 30-35, balingkinitan, nakasuot ng sports jacket na pula at bull cap. Agad itong tumakas bitbit ang sumpak na ginamit.

Sa ulat ni PO2 Jupiter Tajonera, naganap ang insidente dakong alas-5:50  ng umaga, sa loob ng tahanan ng biktima

Natutulog umano ang biktima sa tabi ng misis na  si Lyna nang may sunud-su­nod na katok ang gumising sa kanila. Nang pagbuksan, agad binaril sa leeg ang biktima ng anim na ulit.

 Isinugod pa sa Gat Andres­ Bonifacio Hospital ang biktima subalit dakong alas-6:17 nang ideklarang dead-on-arrival.

Hindi pa makunan ng pahayag ang misis ng  biktima na kasalukuyang trauma­tized pa sa pangyayari.