Ospital sa Maynila, inalerto sa Undas

MANILA, Philippines - Pinaalerto ni Manila Mayor­ Alfredo S. Lim ang anim na ospital ng city govern­ment ngayong Undas­ bilang paghahanda sa po­sibleng pagdagsa ng mga pasyente.

Ayon kay Lim, kailangan na handa lahat ang pasilidad ng anim na ospital upang agad na mabigyan ng medical attention ang mga pas­yenteng dadalhin dito.

Maging ang Manila Health Department sa pamumuno ni Dr. Evangeline Rafanan ay inatasan ni Lim na maglagay ng kanilang mga medical stations para sa emergency cases sa mga sementeryo.

Samantala, pinaalalahanan din ni Lim sina Manila North Cemetery chief Eddie Noriega at Manila South Cemetery director Henry Dy na tiyakin na walang matatalas na kontrabando, alak at maging mga baraha ang makapapasok sa loob ng sementeryo na umano’y kadalasang pinagmumulan ng gulo.

Nabatid na may nakahanda ring mga wheelchair para sa may mga kapansanan upang hindi mahirapan sa pagpasok sa loob ng sementeryo.