MANILA, Philippines - Napatay ang isang 38-anyos na tricycle driver makaraang pagbabarilin ng dalawa sa tatlong armadong kalalakihan sa bahagi ng Old Balara sa Barangay Apolonio Samson sa Quezon kamakalawa ng gabi. Napuruhan sa ulo ang biktimang si Joel Toquero ng # 29 Silangan Street, Kaingin Bukid sa nasabing barangay.
Ayon kay PO3 Modesto Juanson, naganap ang krimen sa gilid ng Family public market sa kahabaan ng Old Balara bandang alas-10:30 ng gabi. Base sa police report, kinukumpuni ng bikitma ang gulong ng kanyang tricycle nang lapitan at pagbabarilin. Tumakas ang gunmen lulan ng motorsiklo na walang plaka kung saan narekober naman sa crime scene ang 3-basyo ng baril.