84-anyos na lolo natagpuang patay

MANILA, Philippines - Patay na nang matagpuan ang isang 84-anyos na lolong­ dating U.S. veterans na hinihinalang hinataw ng matigas na bagay sa ulo kamakalawa sa Caloocan City.

Kinilala ang nasawi na si Nicolas Bianzon, residente ng Dolmar Subdivision, Llano, ng nasabing lungsod.

Sa imbestigasyon, dakong alas-3:00 ng hapon nang ma­tagpuan ang bangkay ng biktima sa loob ng bahay nito nang puntahan ng kanyang mga kapitbahay na si Cirilia Datuin, 48 at Virginia Benedicto, 51 dahil napansin nila na hindi lumalabas ang biktima.

Subalit laking gulat ng mga ito nang bumulaga sa kanila ang nakandusay na katawan ng biktima sa may kusina kung saan ay wala nang buhay ang matanda na naging dahilan upang agad na itawag sa pulisya.

Lumalabas sa inisyal na pagsisiyasat ng mga rumes­pondeng Scene of the Crime Operatives (SOCO), nagtamo ng sugat sa likurang bahagi ng kanyang ulo ang biktima na hinihinalaang pinalo ng matigas na bagay.