MANILA, Philippines - Utas matapos na barilin sa ulo ang isang 45-anyos na fish dealer nang manlaban umano sa armadong holdaper na umagaw ng kaniyang dalang clutch bag, habang kumakain sa isang karinderya sa Balut, Tondo, Maynila, kahapon ng umaga.
Dead-on-arrival sa Tondo Medical Center ang biktimang kinilalang si Jonel Arbulado, ng Oroquieta St., Sta. Cruz, Maynila.
Mabilis umanong tumakas ang hindi pa kilalang suspect tangay ang clutch bag ng biktima na naglalaman ng hindi pa tukoy na halaga ng cash. Dakong alas-5:55 ng umaga nang maganap ang insidente sa panulukan ng Kalakal st. at H. Lopez Blvd., sa Balut,Tondo, Maynila.
Nag-aalmusal umano ang biktima sa isang karinderya nang lapitan ng suspect at agawin ang clutch bag.
Nabatid na nanlaban ang biktima dahilan para ito barilin ng suspect. Patuloy pa ang imbestigasyon para madakip ang suspect.