MANILA, Philippines - Dahil lamang sa tsinelas pinagbabaril hanggang sa mapatay ang isang factory worker ng kanyang roommate na security guard , kahapon ng umaga sa Caloocan City.
Namatay sa Valenzuela General Hospital sanhi ng tama ng bala sa dibdib ang biktimang si Felvin Mulle, 33, ng General Luis St., Brgy. Kaybiga ng nabanggit na lungsod.
Pinaghahanap naman ng mga pulis ang suspek na si Richard Angoy, ng nabanggit ding lugar.
Sa imbestigasyon ng Caloocan City Police, naganap ang insidente dakong alas-8:00 ng umaga sa loob ng inuupahang kuwarto ng biktima at suspek.
Nauna rito nagtalo ang dalawa makaraang isuot ng suspect ang tsinelas ng biktima. Imbes na humingi ng paumanhin ay naasar at nagalit pa ang suspect kung saan kinuha nito ang kanyang baril at saka pinaputukan ang biktima na naging dahilan ng agaran nitong kamatayan.